• REGIONAL
  • Yamad Mam Un Kubni Evav Na Tet Waw Nasngatil Fo Madivun Loor Hoar Yew Kotrat Ratot Hanam Fangnanan Tevat Yait U Vel 2022

Yamad Mam Un Kubni Evav Na Tet Waw Nasngatil Fo Madivun Loor Hoar Yew Kotrat Ratot Hanam Fangnanan Tevat Yait U Vel 2022

WARTALIKA.id – Kubni Evav na farmai fo La ai Kapal Nutun Ohoi Ranem na a Madivun Loor Hoar Yew Kotrat na a  Ohoi Revav fo Ratot hanam fangnanan Ohoi Nuhu nan sang lidar karja tevat yait u vel (2022) Mo Yamad Mam Un Kubni Maluku Tenggara enhoov ni ngaban mel Balit fo hires Kapal Ohoi Nuhu Rasdoov raar ne ranem Fangnanan fo u wel wel ne ai rang rang ledar karja 2022.

Yamad Mam Un Kubni Maluku Tenggara nangrihi ne Nem nem an i nan farmai lidar yait an U  vel, niraan ne tanem fo famehe ivud raad fo kes u ne yaang Muir nandading Ohoi Nuhu vut enwaw na a Loor KKT fo bok bok hanarun enli ntal haran leer i raan, Uun Kubni ni farmamai.

Toran Yamad Mam Uun Kubni Ai vul nanar le Bal rayat Hoar Yew Kotrat i rafmaryadat vuk ne ental tevat loor Ohoi Ratut Revav rabeen sul enhoov ni Tiva, Dada Savarngil Ol nan tarim Ya a Uun Kubni enhoov yaan teen kantor bes besa en oy ram rumian nas oor sarmehe do mahabat na a Bir Siran Loor Ohoi Revav ni, Toran na hol sitil rehe.

Yamad Mam Uun Kubni Evav enfitil na a ni ngarihilein i ne balrayaat na a Hoar Yew Kotrat i rir vavain bok hob mo Tevat Yait Enmur vel iya Kubni rana kubang abal Hiba fo nan fadading Rahan Moor Aingan enhoov riin rahan na a ohoi nuhu fo bok bok, Hanubun ni Ngarihilein.

Toran Yamad Mam i na heer vuk ve Balrayaat Evav i fo ni kanutun ain Kubni na karja afa ain mo nahatut na ai, vat, tanat iya Naheer fo ajad iya miharang na dokdok fo minai bir maksud afa ne batang mi ot Huwear fo nan nahang karja i wehed, Ya a i kot evav ihin mo mido fo ta tot hanam afa imbir hak ne am kubni ma blet fo im te raab lulin am kubni te raab lulin vuk, Yamad Mam Uun Kubni Ni sinib.

Baca Juga: Pembangunan JUT Ohoi Wain Mandek, Bupati Malra Diminta Tegur Felix Tethol

Baca Juga: Bupati Malra Buka Musrenbang Kei Kecil Timur di Ohoi Revav

Baca Juga: Lampu Jalan Nyala, Ohoi Denwet Kini Terang Benderang

Baca Juga: Masyarakat Ohoi Revav Sambut Musrenbang Kecamatan Kei Kecil Timur

Yamad Mam Uun Kubni Na holtul vuk ne leer i Kapal OPD besbesa rahoov madivun  i, Hiir Tun Avun na a Hoar ew Korat i besa rahov lidar Madivun Loor i naba  enhoov bebeen malmalit ti entut na a wahan ne enhaar na a soin, Hanubun nahol tul afa i.

Toran Hanubun nasak lim tanan takteen veeer Camat endaang Kapal Ohoi Revav envav na balrayat na rir  ot ot da dad ram rumian leer i Nafmayek, namaryadat, uloang non imbesa.

Ohoi voho  na a utan en i ra yoat wear bersih hob waun ohoi watngon mo Yait enmuur 2022 iya fel ajad iya Kubni Evav naleeng fangnan wear maditin veer ohoi an i, Hanubun na farmai.

U Blet Im besa dee ne Teten ranar ne Ruat naslaan tubur ne Leer naslaan vuar ne lidar karya lian nateek am mo fel ajad iya Ya a Uhoov Lai Kapal Kubni OPD mabati Gereja Revav fo maliik ni karya fel waun fel ibe, mo tabe fangnanan mayuyuun veer Imbesa, Ujo Ublet.

IKUTI KAMI

WARTALIKA TV

MOTIVASI HIDUP

Wartalika.id Klik allow notifications untuk menerima berita dan pembaruan dari kami
Dismiss
Allow Notifications