PWI KOORDINATORIAT JAKARTA BARAT

  • REGIONAL
  • Edmundus Renwarin An Haved Dok dok Ne Ni Beb Laar Hiru Ajad Pastor

Edmundus Renwarin An Haved Dok dok Ne Ni Beb Laar Hiru Ajad Pastor

7 hari ago
53

WARTALIKA.id – Edmundus Renwarin i Kapal Ohoi Orongkai Faan en haved dokdok, enhoov raan nasmirin ne meman laiiin ne ni beb laar hiru ajad Pastor na a rir fo riin ne bardik rahan MSc, Ait Edmundus enhol ni fangnanan i naang Ohoi Faan leer aar Kamis asmer mer 29 April 2021.

Ait Edmundus Renwarin an hool ne koko yanad ubud hiru i artal rok ya au dokdok i, tomat lean arfikir ne kotkot hiru i artal Iso anhoov Ohoinol neroki waun felya : Tete Dit ain ental Am Renwarin Faan an fau na a Rettob Wearlilir vakbo yanan vat ain warwarin lesus i anfau enhoov kot Bran Lefubun ain antal Ohoinol vakbo yanar i Kot Pastor Alowesius Xaver Lefubun MSc i ne, Amam Tete Dit ain anfau anhoov Toran Yamrvav Iso ain vakbo Nisun Evra rok i Pastor Nikolaus Yamrevav MSc  i mo koko hru i bisa utir Tom formas ne Ngair Songrangel rok i Yaau Emundus Renwarin Kapal Ohoi Faan i anhoov Toran Uun Rat Yab Faan i mo fel hiru ar ot Mis Fangsear na a Gereja Faan i iya umnar sa afa val ed karna Utir Tom Formas ne Ngair Songrangel, Ait Edmundus enhool.

Koko hiru hirdok Faan Wearlilir i mo wear ahar ne war benau nan fa an hiru naang rir skol sarmehe hiru ratavloen ental mitin evav i fo errba loa boar rir ilmu kakain naang tanat yaar maav sarmehe leer i raan vakbo it yante besa tanem il val na a mitin evav, nuhu kilkilun i, Ait enhool ni fangnanan.

Ait Edmundus Renwarin nasib ngarihi lein Adat teteen ubnus Yanang Ubung Imru  mi fatlin fabok afa usib sib i ne “ Mafoi im fo Faar waid ne Mafoi im fo Yeu mo mivaar mam snib fo bok Waun Moor dedim ravaar rir kuviat naang laut Samsiw “ ne imru bir bubun mas rok am Renwarin Faan i, mo Amheer veer imru fel ajad iya mibatang bir tugas i fo bokbok, imru fo duad ni warmimin mo bir tugas moor aingam he mi taha ti entut na a wahan ne enhaar na a Soin, Ait ni snib.

Imtaha Hukum Aingam fo bokbok, anhoov hukum kubni fo bokbok enlival iya hukum Larvul Ngabal, ne naang bir wai karja raan iya miblet hormat umat besa ental ni bubun mas sarmehe sit yahau ne manlangwar besa fo umat terar sanang mo nit te rarsenang naang bir wel banbanan dedan hamar besbesa.

Mo U heer ental Nit Haar U Famuur na a Fau ivak ni siksikat fo hoov arvehe imru bir belan aingam i fo nakso hanarun enbati U vellll oooo.

Mam Imru….Im Angkod matveer na a bir U jang, mo U heer fo Teteen Ubnus besbesa ardiir ruhub mel balit hoov ra fatlin banbanan bir belan fo anlauk ental yeer vat na a tahai bung sawel ne yaran bal sarmav entubur he neroki bir belan naakso hanarun enbanti u roro vel ooo.

Ne Teteen Ubnus mitin evav hir batang haraang imru besa fo bir u ajang i enba bok bok niraan mivaar evav meman, en oho rok he.

IKUTI KAMI

WARTALIKA TV

MOTIVASI HIDUP