• REGIONAL
  • Nen Maria Enhoov Santa Bernardeta Erdok El Vovot

Nen Maria Enhoov Santa Bernardeta Erdok El Vovot

WARTALIKA.id  – Leer i, Tad fanean Bok ne Nen Maria hiru Santa Bernardeta ersu Woma El Vovot er tai tavuk na a did Woma i nan fatnitang raar fangnanan veer rir umat stasi Letvuan kanimun na a did wel tai banbanan hovan hamar leervut i besa fo ta vait senang ain enhoov ain, Ngarihi lein i Toran Wen Tawurutubun nanar sak tevat ensu fo bansubiyan na a nen Maria niwa doknain, Rob 8 September 2021.

Wen Tawurutubun enhol ne, Nen Maria Ni Wai Doknain i nan fatul Gereja har u lalain i niwai den i fo koko tuuv haar famuur i erkai ne weaar maluruk ul yaan na a Woma El Vovok ne Ohoi Letvuan su endik na a den i, Wen en hol Nitang.

Wen Tawurutubun nanar vuk fo umat erkai vuk ne wai dok diirnaen den i vuk  Mol Mol Ful-filik mo batan at ot afa sisian na a wai doknaen deni waid, Wen en hol sib snurat.

Wen Tawurutubun nanar vuk ne Nen Dit Sakmas vuk entubur na a lekan oden tanat loortel i enba enveva nuhu roa i envaar ni Hukum Adat fo ityante besa did kes u ne yaaang muur famehe haran i, waun vuk Nen Maria hiru Santa Bernardeta leer i raan ertubur su Woma El Vovot fo hiir vuk tutuur madoman na a ityante besa diwawaat na a aingan Katolik ni farmamai, Wen ni loloang.

Mo fel ajad ia u heer veer it yante besa woma El Vovot ni siksikat fo tafuriik raad, ta famehe did fangnanan, it vatuk lauk afa sasian besa fo did wel tai, banbanan urat kerja lervut enba nanorang Nendit Sakmas enhoov Nen Maria rir fangnanan. Ne Tevat ain Hiru besa nak rasval wahar erdo hir fatlin did Doa her heer taromlein veer hiru, Toran Wen na sib.

Toran Wen Na her veer Nen Maria ne Leer i Raan O Renab Nen Maria Kelmutun su Umdir na a mu wai doknain na a Woma El Vovot i fel ajad i a umreng waus amyante besa mam fangnanan raab i fo bokbok maditin nan vingu farneha Ohoi Letvuan na a sus te senang u roro wel, um na Yanam Mehe Wain i ni berkat sorngai veer amyante besa, umna berkaat reski rahamaat veer ambesa fo nan lehar yanab warib ubub erhauk rir kakain dunyai fo leran hir jad umat fo ra vingu El Vovot ni sus te senang vavain  dedan te hamar. Um taha lauk sukat sangruan, elsuhut binakit envavna vivin matmatan, vuk vengar ka, hitil hangat na a fo riin ne bardik rahan ya an waar yante su harang ngur woma, woma kasal  El Vovot besa ne Nen Maria O vakbo Umkai Yanam Mehewain ni dodok na a Sorngai Raan, Waun enhe U heer veer Nen Maria O.

IKUTI KAMI

WARTALIKA TV

MOTIVASI HIDUP

Wartalika.id Klik allow notifications untuk menerima berita dan pembaruan dari kami
Dismiss
Allow Notifications