Foi Ahai Vee Yab Kasbi, Enbal Fo Kes U ne Yaang Muur Nuhu Evav ni Siksikat

  • Whatsapp
Malra
AGUNG NUROHO

Waidbo Toran Sergi Ditubun na Farmai waun fel iya.

WARTALIKA.id – Ve e Yab Kubni ni Leleeng tibtibang naang nutun Kot Kaba indonesia raan fo Kes Yaang singrahang COVID19 naslavar nansabyeer balrayat Nuhu Evav i nanweang Aad warid Ohoi Semaw ain tumandeel ain naang yaat aturrun Vuar lair ne Kikiw Yewahan nan’ot fangnanan entafli mo hir besa rasnutuk naang kantor Polsek Kei Kecil Timur leer aar Rob 20 Mei 2020.

Bacaan Lainnya

Let sebab ngengeen ve’e yab iya fangnanan enharang Teen Yaan Kapal Ohoi Nuhu Ohoi emaw waid, enhoov Soa Sanir Adat Ohoi Semaw nan ot fikfikir entafli nan weng Kot Ohoi Semaw meman Finsen Ngangun en yoat tuman deel ental Alo Ditubun. Hol hol enti vakbo hir besa hera mehe yanan ubun mo Toran Teen Yaan Kapolsek envo’o heer hir besa ro ra fadading fdukung fangnanan yantete mo een rok.

Haang hebang hir yaan waaru Alo Ditubun enhoov Finsen Ngangun i Kapolsek nafadad rok mo lin entut yaar maav nanteuk Kubni Maluku Tenggara enhoov hir wain Tun Avun raharang Kapal Semaw enhoov balrayat ranem fangnanan  fo ngutun enyau ken Tenan  ne Karat enyau Karbaav vakbo kerja fangnanan nasluruk te we’ed.

Waidmo Toran Sergius Ditubun (Purn ABRI) nanar ne “IT DOK DUNAYAI I, AFA LEMAN TA’OT ADAT VAKBO LIN ENTUT YAAR MAAV“ NE TETEEN HIRSIB NE ADAT EN LAAN ADAT FO KELMUTUN MAHILING “ niraan ne Harta i bulir ne Minan i Umat it farnene Adat enharaang Kapal Ohoi Nuhu enhoov balrayat kanimun.

Sergius nanarvuk ne “ADAT DUNYAI NI BALETAN EVAV“ Niraan ne Tablet Hormat nanfadukung Adat fo ni hormat na’a, U herang vuk karna Kapala Dinas Pertanian maluku Tenggara in fikirken amam Kapal Ohoi Semaw enhoov ni tuun kwas adat ohoi nuhu waid vuk. Am Yanat Adat vuk ne fo Adat enharang teteen Yayaan Ohoi Nuhu Semaw odan vuk we’ed, harmes waun am fo waut tata wat ne mam hormat vus, Sergius In Farmai.

Sergius in harap fo fangnanan i, kensa it fadading fo endok ken ni doknain fo Kubni Im Tarim enhoov raab sanang, Am Balrayaat enhoov Kapal valte matarim enhoov bok bok, bebeen malmalit bo batang afa fo nan laafur ne vengar ka, hitil hangat fangnanan wahid, Sergius ni ngarihi wahan.

Pos terkait