Madivun Loor Wain Ohoi Envavna Loor Ifaak Ratschap Sakmas Wain

WARTALIKA.id – It Yante Utan Loor Rat Sakmas Wain ni loloang ajad iya fo meat su entub raad I na a Wai doknain Kader Uun Rat Sakmas Wain it fatlin ken ed na’a raad ental Yamad Mam Rat Abdul Hamid Esomar namat talik ityante Loor la’ai vat bal I ental Yaet en il Yaet sarmehe Yaet 2022 Kader an I hob entub ahai ohok na’a Woma Mar;I Lael, ityante besa tavel fo meat utan Loor fo la’ai na’a raad.

Ait Meki Labetubun ensak raan tevat Madivun Loor Sakmas Wain ental Loor Nidi enharang Kol nadidir Rat na’a Kepal Ohoi Wain Ohoivait Ni Soet Saar.

Ait Meki Nanar ne Rat Sakmas Wain ni Yaat I ma’afa ne ni belan enso we’ed ne Belan I enloi, belan I ni marvehe enhoov ni  mardunga na’a nutun kovat mir neroki ni Diirnaen U vel hob vus, ni  U Dirnaen fo na’a vakbo  enfarmai fo belan enso ne yaat enwel fo dirnaen en ahai wad lerat nafla laut sam siw fo tavaar indo did siran loor fo ityante besa ta’a vovov nan haavuvung  it besa, Ait  Meky Labetubun ni loloang.

Ait Meky Labetubun en famirik Utan Loor Kerbaw Siw Sakmas Wain ni loloang ental Loor nidi enharang Kol endidir en her veer la’ai Kapal, Nen Aav ne Aitmem, urang waring, Tuuvken Sarvalin, sian lulin tanem ivud ne Tasdoov rat, tahavuvung raad fo Tavoing fo Kut Ain ne Tafaw fo Banglu vatu enhoov Uwelwel ne Ai Rangrang fo taher masuhun veer Yamad Memid, A ad ne Warid Toran Hi. Abdul Gani Wokanubun S.Pd fofel aad iya fel ajad iya I vakbo ajad Penjabat Raja Sakmas Wain fo I vis bad, I fo tutur madoman na’a lekan Hoar Yew Kotrat karna  Adat te Niwai, Kubni Te Niwai mo Moor Aingam niwai, niraan entaha Henilit bok, Meky Labet ni Sinib nan urik Laar itel.

• Baca Juga: Musyawarah Masyarakat Adat Mel Yamfaak Wain Ohoivut dan Loor Ifaak Digelar di Kediaman Kepala Ohoi Wain Baru

Meky Labetubun na urang u hoov muur ne, nemnem Madivun leer’I entub fo Tom ain ne ni tad iya Hi. A.G. Wokanubun jad Penjabat Rat Sakmas Wain. Ne mifatlin fob ok, fel hera te hera, um hoov mu vuat loan fo mihauk mi vengar ka ne hitil hangat, riik ham  Madivun leer I iya Ait Meky Labetubun Naher veer Teteen Ubnus haar’u  rat raharang Hukum Larvul Ngabal enhoov Nendit Sakmas fo rarat  Duad Kaan Tom Hirin fo raheer Salfuur Akherat su nan salfuur hauk hera tet hera um hoov  yanam ubum, tuuvkensarvalin fo mihitil hangat ne vengar ka, riikhan Madivun leer I entub Tuuv Haarvit ne Maav derat, in oho oden he. Tabe dee.